A Man's a Man For a' That Lyrics

Lyrics - Robert Burns
Melody - For a" that an" a" that

Is there for honest poverty
That hings his head, and aa that
The coward slave we pass him by
We dare be poor for aa that
For aa that, and aa that
Our toils obscure, and aa that
The rank is but the guinea"s stamp
The Man"s the gowd for aa that

What though on hamely fare we dine
Wear hodden grey, and aa that
Gie fools their silks and knaves their wine
A man"s a man for aa that
For aa that, and aa that
Their tinsel show, and aa that
The honest man though e"er sae poor
Is king o men for aa that
Ye see yon birkie ca"d a Lord
Wha struts and stares, and aa that
Though hundreds worship at his word
He"s but a coof for aa that
For aa that, and aa that
His ribband star, and aa that
The man of independent mind
He looks and laughs at aa that

A prince can mak a belted knight
A marquis, duke, and aa that
But an honest man"s aboon his might
Gude faith he mauna fa that
For aa that, and aa that
Their dignities, and aa that
The pith o sense and pride o worth
Are higher rank than aa that
Then let us pray that come it may
As come it will, for aa that
That sense and worth, o"er aa the earth
Shall bear the gree, and aa that
For aa that, and aa that
Its comin yet for aa that
That man to Man the warld o"er
Shall brothers be for aa that