A Man's a Man for a That Lyrics

Is there for honest poverty
That hings his heid an' a' that?
The couard slave we pass him by,
We daur be puir for a' that
For a' that, an' a' that
Our toils obscure an' a' that
The rank is but the guinea-stamp
The man's the gowd for a' that
Whit though on hamely fare we dine
Wear hoddan gray an' a' that?
Gie fules their silks an' knaves their wine
A man's a man for a' that
For a' that, an' a' that
Their tinsel show an' a' that
The honest man though e'er sae puir
Is king o' men for a' that
Ye see yon birkie caad a laird
Wha struts an' stares an' a' that
Though hunders worship at his word
He's but a cuif for a' that
For a' that, an' a' that
His riband star an' a' that
The man o' independent mind
He looks an' lauchs at a' that

A prince can mak a beltit knight
A marquis, duke an' a' that
But an' honest man's abune his might
Guid faith, he maunna faa that
For a' that, an' a' that
Their dignities an' a' that
The pith o' sense an' pride o' worth
Are higher rank than a' that
Then lat us pray that come it may
As come it will for a' that
That sense an' worth ower a' the earth
Sall bear the gree an' a' that
For a' that, an' a' that
It's comin yet for a' that
That man tae man the hale warl ower
Sall brithers be for a' that