Och wat wor dat fröher schön Lyrics

Wat hät doch Köln sing Eigenart verlore,
wie wor dat Levven he am Rhing su nett.
Mer es sich selver nit mie rääch em klore,
Ovv mer ´ne Fimmel oder keinen hät.
Dä fremde Krom, et es doch zo bedoore.
Als ahle Kölsche schöddelt mer d´r Kopp.
Deiht mer sich bloß die Dänz vun hück beloore,
stüß einem jedesmol die Heimat op.
Och wat wor dat fröher schön doch en Colonia,
wann der Franz m´em Nieß nom ahle Kohlberg ging.
Wann d´r Pitter Ärm en Ärm m´em Appolonia
stell vergnög om Heinweg ahn zu knuutsche fing!
Wer hät dann fröher jet vum Jazz un Steppe,
jet vun däm hochmoderne „Blus" gekannt?
Die Blus, die mir gekannt, dren sooch mer höppe
et Bell em Walzertempo lans de Wand.
„Ich küsse Ihre Hand", wie hück se kruffe,
dat hät mr fröh´r zo sage sich schineet.
Do heeß et einfach: „Liehn mer ens ding Schluffe,
ich ben zum nächste Schottisch ankascheet!"

Och wat wor dat fröher schon doch en Colonia...
Die sechsmol zweiundzwanzig bare Pfennige,
dat wor ne Wochenluhn vun nem Commis.
Dä wot verdanz, mer fohlt sich wie de Könige,
de Zech zom Schluß bezahlte dann et Liß.
Die Kavaliere leete met sich handele,
wenn mer als Mädche Schleß un Kohldamp hat.
Trook hä en Dösche met gebrannte Mandele,
die woten dann gelötsch bis dat mer satt.