Begeer Lyrics

Hoe warm blink die heuning op die lippe van Delilah
Hoe skelm span die lyne van 'n vriendelike vrou
Hoe dieper jy verstrengel raak in lepel lê se spinnerak
Hoe vlakker dobber die onskuld in daai oë van jou
daai oë van jou
Jy ken die vonkel in die oog van 'n sluwe engel
Jy sien haar skitter op die paartie van die jaar
Jy strompel by haar voordeur in en tuimel deur haar venster
Hartstogtelik in andermansland, in die agterplaas van jou hart
Die agterplaas van jou hart

Chorus:
Sy louter jou met die trane van haar moeder
Sy temper jou met die sweep agter haar deur
Sy suiwer jou met die klippies in haar filter
Sy wys vir jou die kraak in jou mondering as jy haar begeer
As jy haar begeer
Daar's 'n spinnekop in die wingerd en sy pik jou in die hakskeen
Sy's die weduwee van waansin wat die wandelaar mislei
Jy's 'n magtelose stroper in die knoop van haar narkose
Sy vergiftig jou en spin jou toe in sweet en satyn
Sweet en satyn
Chorus:
Sy dompel jou in die branders van haar delta
Sy balsem jou in die water van haar meer
Sy martel jou in die vlamme op haar altaar
Sy lê jou bloot in boeie en beloftes as jy haar begeer
As jy haar begeer