Bacche, bene venies Lyrics

Bacche, bene venies gratus et optatus,
per quem noster animus fit letificatus.

Istud vinum, bonum vinum, vinum generosum,
reddit virum curialem, probum, animosum.
Bacchus forte superans pectora virorum
in amorem concitat animos eorum.

Istud vinum, bonum vinum, vinum generosum,
reddit virum curialem, probum, animosum.

Bacchus sepe visitans mulierum genus
facit eas subditas tibi, o tu Venus.

Istud vinum, bonum vinum, vinum generosum,
reddit virum curialem, probum, animosum.

Bacchus venas penetrans calido liquore
facit eas igneas Veneris ardore.

Istud vinum, bonum vinum, vinum generosum,
reddit virum curialem, probum, animosum.

Bacchus lenis leniens curas et dolores
confert iocum, gaudia, risus et amores.
Istud vinum, bonum vinum, vinum generosum,
reddit virum curialem, probum, animosum.

Bacchus mentem femine solet hic lenire
cogit eam citius viro consentire.

Istud vinum, bonum vinum, vinum generosum,
reddit virum curialem, probum, animosum.

A qua prorsus coitum nequit impetrare,
Bacchus illam facile solet expugnare.

Istud vinum, bonum vinum, vinum generosum,
reddit virum curialem, probum, animosum.
Bacchus numen faciens hominem iocundum,
reddit eum pariter doctum et facundum.

Istud vinum, bonum vinum, vinum generosum,
reddit virum curialem, probum, animosum.

Bacche, deus inclite, omnes hic astantes
leti sumus munera tua prelibantes.

Istud vinum, bonum vinum, vinum generosum,
reddit virum curialem, probum, animosum.

Omnes tibi canimus maxima preconia,
te laudantes merito tempora per omnia.

Istud vinum, bonum vinum, vinum generosum,
reddit virum curialem, probum, animosum.
Istud vinum, bonum vinum, vinum generosum,
reddit virum curialem, probum, animosum.
Istud vinum, bonum vinum, vinum generosum,
reddit virum curialem, probum, animosum.