Traumglück Lyrics

Do der Sumer komen was,
und die bluomen dur daz gras
wünneclichen sprungen,
alda die vogele sungen,
do kom ich gegangen
an einer anger langen.
Da ein luter brunne entspranc:
vor dem walde was sin ganc,
da diu nahtegale sanc.

Bi dem brunnen stuont ein boum,
da gesach ich einen troum:
ich was von der sunnen
entwichen zuo dem brunnen,
daz diu linde maere
mir küelen schaten baere.
Bi dem brunnen ich gesaz,
miner sorgen ich vergaz,
schier entslief ich umbe daz.
Do beduhte mich zehant
wie mir dienten elliu lant,
wie min sele waere
ze himel ane swaere,
und der lip hie sollte
gebaren swie er wollte.
Dane was mir niht ze we:
got gewaldes, swiez erge,
schoener troum enwart nie me.

Gerne slief ich iemer da,
wan ein unsaeligiu kra
diu begonde schrien.
daz alle kra gedien
als ich in des günne!
si nam mir michel wünne.
Von ir schrien ich erschrac:
wan daz da niht steines lac,
so waer es ir suontestac.
Ein vil wunderaltez wip
diu getroste mir den lip:
die begond ich eiden,
nu hat sie mir bescheiden
waz der troum bediute,
daz merket, lieben liute!
Zwen und einer daz sint dri:
dannoch seit si mir da bi
daz min dume en vinger si.