Ds Lied vo de Bahnhöf Lyrics

Das isch ds Lied
vo de Bahnhöf wo dr Zug
geng scho abgfahren isch
oder no nid isch cho
und es stöh
Lüt im Rägemantel dert und tüe warte
Und ds Gepäck
hei si abgstellt und zwöi Chind
luegen am Outomat
ob nid doch dert no meh
usechöm
als die Caramel wo si
scho hei gässe

Und dr Bahn-
hofvorstand telephoniert
d'Mütze hanget ar Wand
und im Wartsaal isch gheizt
sitzt e Ma
won e Stumpe roukt wo stinkt
und list ds Amtsblatt
Mängisch lüt-
tet e Gloggen und en Ar-
beiter mit schwarze Händ
stellt e Weiche me weis
nid für was
dänk für d'Güeterwäge wo
vor em Schopf stöh
Und dr Bahn-
hofvorstand leit d'Mützen a
s'fahrt e Schnällzug verby
und es luftet no gäng
waretdäm
dass dr vorstand scho sy Huet
wider abziet

Das isch ds Lied
vo de Bahnhöf wo dr Zug
geng scho abgfahren isch
oder no nid isch cho