Veujoar in de kop Lyrics

De boeren vlaigen over t laand,
Op klaai, op zoavel en op zaand,
Want elk en ain het t veujoar in de kop.
k Heb mien sjelötten der aal weer in,
k Bin nooit zo loat, da's mie te min,
Want elk en ain het t veujoar in de kop.
De koater met zien dikke kop,
Die springt ter mor weer bovenop,
Dus moezevangers heb ik straks genog.
Op bozzem stoan de waalze bonen,
En Gittje is kwoad want dij wil schonen,
Want elk en ain het veujoar in de kop.

De boeren zaaien de eerste baiten,
Mit Poaske goan we neuten schaiten,
Want elk en ain het veujoar in de kop.
Ons jong dij in slootwale zit,
Dij vangt zien eerste kikkerrit,
Want elk en ain het veujoar in de kop.
Oet Sodem kwam n envelop,
Doar ston t woord 'belasten' op,
Ik wer glad kèl, ik docht dat kost mie centen.
Ik muik hom open, las hom vlug,
Verdold - ik kreeg nog wat terug,
Want elk en ain het veujoar in de kop.
Wat hevve lekker stamppot had,
Mor leeg is nou t sniebonenvat,
Want elk en ain het veujoar in de kop.
De klaaier worden op t wasrek hongen,
En guster het n liester zongen,
Want elk en ain het veujoar in de kop.

Mien ootje kocht zich n nij gebit,
Omdat heur ol' nait goud meer zit,
En wie wollen van gerabbel wel es òf.
De zun die stekt, de lucht is blauw,
Wie goanen weer noar de zummer tou,
Want elk en ain het veujoar in de kop.